政壇：林健鋒派膠鴨似「死Duck」
吹氣巨型膠鴨受到唔少市民追捧，香港總商會主席周松崗話，咁啱總商會有理事都係膠鴨製造商，既然市民咁鍾意膠鴨，明年總商會搞周年慶祝活動時，可能會考慮吓用膠鴨做賣點，實行「全民賞膠」。適逢今年係總商會第一百二十五周年「生日」，所以本月二十九號會請全港市民免費搭電車同天星小輪。
好多人都知總商會立法會代表林健鋒爸爸林亮，正正係本地「膠鴨之父」。林健鋒尋日就喺立會周圍派玩具膠鴨，工程界盧偉國就話個孫晚晚都要膠鴨仔陪伴沖涼，而鄉議局劉皇發仲擺埋隻膠鴨上枱，叫政府諗多啲低成本、高效益嘅商機。不過，有人形容林健鋒派嘅膠鴨雙眼半反白，好聽啲係向上(目及)嘢，唔好聽就十足死鴨，名副其實係「死Duck」！
