捨近求遠等運來 有地不用是蠢材
古語云：有土斯有財。樓價超貴，租金瘋漲，成為港人揮之不去嘅噩夢，港府口口聲聲房屋政策係施政重中之重，但一講到增加供應咯喎，就一味推說「地從何來」，好似巧婦難為無米之炊咁。事實又係點嘅呢？香港真係無地可用咩？當然唔係喇。
正如有人話齋，本港已開發土地只佔總面積大約兩成，唔只有好多農地閒置，亦有唔少政府土地冇好好利用，港產官僚冇善用土地資源，反而不斷強調本港缺地，簡直九唔搭八。唔怪得有環保組織發出「尋人啟事」，要求發展局局長陳茂波現身諮詢會，唔好一味發網誌危言聳聽。
冇錯嘞，香港其實唔係冇地，只不過港產官僚得過且過，冇認真諗辦法解決問題啫。呢，深水埗區議會尋日開會，區議員指長沙灣臨時家禽批發市場遲遲未搬走，威脅市民健康。其實家禽市場貼近民居，唔只威脅健康，而且浪費土地資源。話時話，呢個家禽批發市場佔地二點六公頃，交通四通八達，地理位置一流，搬遷之後如果地皮用嚟興建房屋，可以解決唔少市民嘅居住問題o架。講起真係唔知好笑定好嬲，長沙灣家禽批發市場話就話係臨時，原來已經「臨」咗接近四十年，港府口口聲聲冇地起屋，但就任由呢個十室九空嘅臨時家禽批發市場長期拍烏蠅，你話係咪敗家吖。
講到敗家，又點只咁少吖。好似食環署轄下二十五個熟食市場，殘殘舊舊，冷冷清清，唔只未能地盡其用，仲由於營運及管理不善，年年虧蝕逾億元公帑。仲有吖，本港有七十幾幅私人會所用地由政府以象徵式租金批出，結果淪為富豪權貴俱樂部，普通市民不得其門而入。試諗吓，如果收番呢啲土地興建房屋，「地從何來」就不成問題喇，使乜搞到咁狼狽吖。
最好笑嘅係，當局病急亂投醫，一時話填海，一時話發展岩洞，一時又話要利用天橋底，一時又話要將政府停車場改建商住大廈，計劃多多，可惜全部不切實際，唔係引起爭議，就係遠水難救近火。當局應做唔做，唔應做就亂嚟，到處點火頭，唔衰攞嚟衰。
正所謂，捨近求遠等運來，有地不用是蠢材。講到底，一切事在人為嘅啫，「地從何來」根本唔係問題，問題在於港產官僚敷衍塞責，既唔肯承擔，又唔肯動腦筋，就算有地都冇用喇，叮！
