政壇：搞搞政：葉劉借巨鴨暗寸林鄭
設計圖片及對白
政務司司長林鄭月娥喺上月底啟動「家是香港」，但由於各界反應一般，發放正能量相信有排先煲得起。就喺呢個正能量「旁落一邊」之際，黃色巨鴨本月初喺香港橫破維港，「睇鴨」變成咗各階層嘅共通語言，如果未睇過就隨時搭唔上嘴，就連行會成員葉劉淑儀都湊熱鬧，尋日喺社交網站發表「鴨‧在香港」嘅文章。
設計圖片及對白
葉劉其實係借巨鴨月旦時事，一切都係暗藏政治寓意。佢嘅文章未特別提到發揮正能量，形容近年來香港整個社會充斥許多爭拗同負面新聞，例如佔領中環、佔領碼頭等，甚至一向注重廉潔嘅港府亦有貪腐醜聞，情況有點似一些議員所講「禮崩樂壞」，因此黃色巨鴨嘅來臨，帶來歡樂及新鮮感，這些正正是香港近年最欠缺嘅東西。
跟住佢更有的放矢，借巨鴨暗寸被佢形容為「妹妹」嘅林鄭，直言相比之下，標榜為香港注入正能量、加強社會凝聚力嘅「家是香港」黯然失色，並指看來項目嘅始創者，要向鴨爸爸Florentijn Hofman取經喎。唔單止咁，佢喺文中大讚議員范國威搞「睇巨鴨食片皮鴨」街坊團有市場觸覺，睇嚟林鄭未向鴨爸爸取經前，可先向范國威偷師。
