政壇：張建宗執番身彩
設計圖片及對白
葵涌貨櫃碼頭工潮圓滿解決，但仲有啲手尾跟，就係有關罷工工人復工嘅安排，不過尋日就有外判商同介入工潮嘅職工盟互抽後腿。
設計圖片及對白
呢啲好明顯係意氣之爭，但站喺政府嘅角度，工潮結束，對於一直瞻前顧後嘅勞工及福利局局長張建宗嚟講，相信可以暫時鬆一口氣。
不過，經過今次工潮之後，有人預視到，相信好難再有工會背景嘅人能夠走入官場做勞福局擔任要職，尤其係局方一直仍未物色到嘅副局長一職。究竟此話何解呢？
未斡旋已成眾矢之的
早喺新一屆政府成立之初，各問責局長就積極咁搵副手，當時盛傳工聯會嘅立法會前勞工界功能組別議員「鄺大狀」鄺志堅有機出任，但拖吓拖吓好似冇咗件事咁。
仲記得碼頭工潮之初，張建宗搵埋工聯會同勞聯加入一齊商討工潮問題，有官場中人事後孔明分析，政府團隊喺工潮過程中擔任中立斡旋角色，如果早前政府真係搵咗有工聯會背景嘅鄺大狀做勞福局副局長，到時睇怕未開始做斡旋工夫就成為眾矢之的，各方有理無理嘅指摘同「扣帽子」都會蜂擁而至，令到解決工潮一事更為複雜化。
至於係咪預視有工會背景嘅人士都難望做高官，有官場中人未有一口說不，但形容「風險一定會較大」，今後亦難保何時再有牽涉多方工會嘅工潮出現。張建宗冇揀到鄺大狀都算係執番身彩，正所謂「經一事，長一智」，睇怕佢將來物色副手時認真要小心潛在嘅政治風險，否則自找麻煩時先至「拆彈」，就真係喊都無謂喇！
