調查貪曾零交代 莫非貪湯在作怪

太一叮講緊嘅咪就係「深圳禮賓府」咯。大家應該記得，貪曾舊年被東方報業集團踢爆廉租深圳近萬呎複式豪宅單位，打算作為退休之後嘅「私人王宮」，事件被踢爆之後，各界質疑有利益輸送之嫌，廉署亦介入調查，佢至不得不棄租。嗱，事隔一年幾，隨住業主近日放售單位，呢間深圳禮賓府嘅奢華裝修亦驚世曝光，裏面有面向落地玻璃嘅按摩浴缸，有豪華大理石地板，有空中花園，有運動室，單係裝修費咋，已經估計高達近二千萬元。貪曾當初以每年八十萬元人民幣就能夠租住，擺明就係獲得超筍待遇啦，呢個官商勾結利益輸送嘅嫌疑，貪曾就算跳落浴缸都洗唔甩呀！

最令人諗唔明嘅係，廉署立案調查貪曾嘅貪腐案件已經超過十四個月，到依家仲係乜嘢動靜都無，又唔向公眾交代，又唔向當局交人，更加無向舉報人交功課，咁算點先？廉署仲要拖到幾時呀？正如有學者質疑，貪曾貪腐案表面證據充分，夠飲幾次咖啡有餘，廉署一再拖延事不尋常，盞自取其辱，打爛自己招牌嘅咋！

正所謂，黃台之瓜，何堪再摘，前廉政專員湯顯明淪為「不廉專員」，已經乜架都丟清啦，如果廉署再唔依法辦事，徹查貪曾，隨時畀人質疑官官相衞，咁就摺埋個招牌都得嘞。話時話，貪湯公認係貪曾嘅愛將，佢○九年已屆退休年齡仍然獲貪曾鬼祟續約三年，把持廉署直到貪曾任期結束，而貪曾落台前夕，仲特別召佢去禮賓府密會半小時添，話無蠱惑都無人信啦。貪曾貪湯關係密切，加上呢啲不尋常舉動，好難唔令人質疑有人故意延誤甚至阻撓調查囉。更何況，貪湯依家亦捲入連串貪腐醜聞，咁就證明佢哋兩個本來就係一丘之貉啦！

正如有人話齋，正義可能會遲到，但係唔會無到。貪湯爆出連串貪腐醜聞，家陣面臨五路「追殺」，除咗廉署立案調查、政府獨立檢討委員會追究、立法會帳委會聆訊、保安事務委員會跟進之外，有議員仲諗出一條新招，罕有引用《議事規則》第二十條提交呈請，要求成立專責委員會徹查事件，睇嚟貪湯呢次都幾難走得甩咯。

嗱，市民眼睛係雪亮嘅，廉署仲等乜吖，仲唔快啲行動，將貪官繩之以法，叮！