政壇：搞搞政：橄欖帶團遊潮汕歎美食
設計圖片及對白
唔少立法會議員係潮汕人士，身為「家己冷」嘅「橄欖」陳鑑林發起暑假潮汕遊活動，打算睇勻當地風景兼食盡地道美食，只限議員同其家屬參加。其實佢喺三年前已試過同前金融服務界議員「金勞詹」詹培忠發起潮汕美食之旅，當時金勞詹包起所有旅客大部分旅費。金勞詹今屆唔再係議員，潮汕團今次冇咗條大水喉，盤川旅費就要貴客自付啦。
設計圖片及對白
三年前嘅潮汕美食之旅一行人先後走訪汕頭、潮州、揭陽同惠州大亞灣，除參加各地市政府為佢哋安排嘅官式宴會外，仲把握時間周圍「搵食」，例如牛丸、滷水鵝肝、潮州粥等，幾乎個個都要捧住個肚返港。今次內地興簡約，可能唔會再難為議員個肚。
橄欖話今年想留多一日玩埋澄海同饒平，又話已搵咗專門設計旅遊套票嘅旅遊界議員姚思榮幫手設計行程，相信一定會比以前更加精彩。橄欖嘅黨友陳恒鑌、葛珮帆已報名參加，依家只要等埋旅行社報價就可正式成團嘞！
