政壇：胡紅玉環保攞對鞋去補
胡紅玉拎對鞋去補，慳錢又環保。
剛獲政府委任競爭事務委員會主席嘅行政會議成員Anna胡紅玉，原來好識得知慳識儉。早幾日見佢現身中環雪廠街，當日落住毛毛細雨，佢冇帶遮喺身，顯得有啲狼狽，惟有盡量行去有瓦遮頭嘅樓底。接住佢好熟路咁轉入戲院里，停喺一間補鞋嘅排檔前，放低手袋喺舖頭枱面，掏出一對用透明膠袋盛載嘅黑鞋，睇嚟係想補番對鞋。
胡紅玉拎對鞋去補，慳錢又環保。
同排檔老闆娘交代咗幾句，佢繼續喺中環大街小巷穿梭，移步到皇后大道中萬邦行，搭扶手電梯上一樓，然後步進一間面積細小嘅女裝店睇衫，佢好有耐性咁逐件睇、慢慢揀，逗留咗十五分鐘，但最後都係冇買到就離開。記者上前同佢打招呼，佢話最近忙於為競委會廣納賢能，要搵夠五十個委員唔易。
