政壇：星爺難提止血動議

梁君彥唔肯代主席操刀

星爺見人拉布至提出呢類動議，都算失咗先機，但遲到好過冇到，等大家辯論下拉布風氣都唔係壞事，不過有議員聲稱，到依家因拉布已浪費逾一千五百萬元公帑，仲未知幾時先收科，睇嚟星爺呢項動議都止唔到血嘞！但建制派似乎已唔耐煩，等主席曾鈺成剪布，反而轉向內會主席梁君彥埋手，希望佢捱義氣做一次「金刀梁」剪布。

因為梁君彥係內會主席，按照議事規則如果曾鈺成要食飯、去廁所、甚至行開行埋，都要由佢頂更，所以有少部分建制派就諗住打佢主意，有人勸佢頂檔期間，不如靜雞雞剪咗布，但精甩尾嘅佢當然唔肯剪，聽聞佢認為剪布係政治決定，自己只係代主席，無必要代曾鈺成背負呢個政治責任，所以最多裁決議員有無違規，例如議員多次重複發言，就會要求佢中止發言，冇諗過要代曾鈺成剪布。

近日仲有傳周四嘅行政長官答問大會係剪布黃金時機，因為曾鈺成喺答問大會趕走拉布四子後，佢哋當日就唔准再返議事廳，但立會秘書處話呢條橋行唔通，因為答問大會同拉布大會屬兩個獨立會議，就算拉布四子被趕走，仲可施施然返去拉布攪局。班建制派有冇諗過換主席呢？如果換咗星爺做，可能分分鐘老早剪咗啦。