政壇：沈祖堯范上達獲頒傑出華人獎
英皇集團主席楊受成（左）頒發傑出華人獎項予沈祖堯。
香港醫學界名人輩出，本為內科醫生嘅中文大學校長沈祖堯及有「換肝之父」美譽嘅養和醫院肝臟外科中心主任范上達，尋日齊獲頒一項世界傑出華人獎殊榮，由英皇集團主席楊受成負責頒獎。咁高興，沈祖堯全家人拉大隊到場分享喜悅，甚少露面嘅范上達太座區嘉麗（Kelly）醫生亦現身支持丈夫。
英皇集團主席楊受成（左）頒發傑出華人獎項予沈祖堯。
沈舉家到賀 楊受成頒獎
沈祖堯父母、太太、千金Winnie、弟弟及弟婦都有到賀，見證沈祖堯接受楊受成頒發獎項。囡囡Winnie依家都喺中大讀緊醫科，莫非佢想繼承父業？Winnie即幽默回應：「哈哈，我唔會做校長喎！」至於范上達太太、從事婦產科專科醫生嘅Kelly話，老公工作咗咁多年，依家攀上人生最高峰，係時候退休抖一抖。不過，范上達笑笑口話自己從未諗過要退休喎！Kelly話，自從老公一九九一年執刀做本港首宗換肝手術，眨吓眼已經二十二年，都已經習慣咗老公咁忙。佢笑稱，當老公搵到第二樣嘢吸引到佢去做，就自然會退休喇！
