反轉天橋冇人吼 推動音樂得把口
記得電影《海角七號》嗎？呢套風靡兩岸三地嘅台灣劇情片，唔止捧紅咗一班Band友，仲令台灣「南極」恒春半島成為旅遊熱點。太一叮唔係轉行做影評人，今日提起呢套電影，完全係有感而發咋。
話說港府唔知係咪受到《海角七號》嘅啟發，斥資五百萬元喺觀塘海濱道天橋底劃出三千幾平方米地方，搞咗個「戶外紅館」，免費開放畀音樂人夾Band表演，仲起咗個潮名叫「反轉天橋底一號場」。發展局話，要透過活化荒廢天橋底，將空置官地轉化為藝術文化用途喎。
聽落就幾吸引嘞，可惜港產官僚從來都係講就天下無敵，做就冇心冇力。今次亦唔例外，又係有頭威冇尾陣，活化變成唔化，表演場地冇人吼，音樂人耍手兼擰頭，「戶外紅館」連大笪地都不如，呢啲就叫畫虎不成反類犬嘞。
呢，有樂隊本來以為政府提供免費場地，可以搞番場似模似樣嘅音樂會，點知原來係「美麗的誤會」，打電話預約場地，職員居然十問九唔知。當局口口聲聲支持本地樂隊文化，原來又係大隻講，叮！
更離譜嘅係，所謂免費完全係搵笨。原來當局除咗提供表演舞台，其餘零支援，申請者要自行解決四大難題，包括供電、後台設備等等都要自己搞掂。天橋八字開，無財莫進來，唔怪得冇人吼喇。講起都好笑，場地今年一月底開放以來，除咗開幕式同四場官方活動，至今未租借過畀私人團體，你話係咪嘥氣吖。
除咗樣樣要申請者自行解決，仲有好多令人O晒嘴嘅無厘頭規定，例如唔可以唱流行曲、夜晚十一點之後要收聲，只能夠靜靜雞唱，到時甚至連人有三急都冇地方解決，問你服未。
嗱，有位本地著名歌手就批評得啱嘞，當局定出咁多無厘頭嘅限制，完全冇考慮過表演者嘅需要。好簡單，如果冇電，樂器、咪同喇叭呢啲樂隊必要器材就廢晒武功；唔唱流行曲，年輕Band友就難以積累表演經驗。政府一係唔好幫，有心幫就唔該做好啲，咪搞到唔湯唔水，不倫不類。
講真，提供電力等設備，使得政府幾多錢吖，班高官開少樽茅台，遊少次埠，乜都喺番度喇。計太一叮話齋，政府所謂活化天橋底推動本港音樂風氣，根本就係葉公好龍，盞嘥公帑，叮！
