SUN搞作：少膽虫手記：HIT ME!BABE!
少膽虫喺裁員潮生存落嚟，啱啱想開支「白事」汽水慶祝之際，忽然又聽到淫賤黎房中傳出「OH！HIT ME！BABE！HIT ME！」的叫聲。有睇開少膽虫手記嘅忠實讀者，大概都知道件事發展嘅公式：就係少膽虫被佢叫入房。少膽虫做足可能見到淫賤黎又同班佞臣勾勾搭搭嘅心理準備，拎埋啲藥水膠布以防萬一，就怯怯哋咁入去喇。
一入到去，只見淫賤黎對住部電腦不停大嗌：「H！I！T！HIT ME！」少膽虫仲以為佢講緊碼頭單嘢，又要落咩柯打作新聞啦，但係見佢手舞足蹈咁，婀娜多姿，豬唇半啟，先至諗起TBB花旦「牆紙珊」首歌。「條女正呀喂……」淫賤黎話：「動身聞整到咁，仲驚無hit-rate？」少膽虫心領神會，即建議：「不如玩大佢，我哋按點擊率分紅，到時包你日日都有得睇呀！」淫賤黎猛力點頭：「好好好！你快啲去搞！」少膽虫一聽，心花怒放，今次仲唔揸住雞毛當令箭？
少膽虫即刻叫人事部出信畀記者，話畀大家知新政策。有位記者主管「菜嫌貴」一收信，無名火起，就衝到少膽虫面前鬧：「少膽虫！又係你嘅屎橋呀？逼人做淫賤嘢，你知唔知咁樣好侮辱新聞專業？」少膽虫呆一呆，就安撫佢：「淫賤都係專業……」菜嫌貴媽聲四起：「咁唔使請你啦老腫，搵部機Mark數就得啦！」少膽虫冷笑：「少年人，你以為我真係做新聞咩？我係做文字上嘅扯皮條咋！」菜嫌貴嬲爆，一手拖住少膽虫入去告御狀。
淫賤黎聽到菜嫌貴陳情，皺一皺眉頭。「係我話嘅！」淫賤黎一句打回頭，少膽虫聽到樂不可支。「按hit-rate分紅好出奇咩？肥豪都係睇吓幫我按幾多嘢，推幾次油出糧啦！」菜嫌貴終極怒吼，豎起中指問：「但係點解我哋底薪會得番壹蚊人工o架？」淫賤黎不解，「仲有咁多？」少膽虫打蛇隨棍上：「菜生，你不如反省吓點樣整鹹自己，整碟鹹菜出嚟！」少膽虫呼一口氣，慶幸食夾棍無畀人知。
