Sun奇古怪：Sun潮語：手殘
最近喺面書睇到一張相，地點係港鐵唔知邊個站，一班睇嚟相當健全嘅人喺度等緊一啲好似專為傷健人士而設嘅lift。一位殘障人士坐住輪椅，反而被迫喺嗰啲健全人士之後，感覺係非常無奈同無助。如果實情係真嘅話，咁嗰班人就真係相當冇品。講真喺香港地生活，冇品嘅事真係唔少，尤其係搭公共交通工具嘅時候。早輪我太太懷孕嘅時候就經常投訴，話有啲後生仔喺巴士明明見到大肚婆都唔肯讓座，扮晒嘢耷低頭捽電話。最離譜係有啲人，明明見你衝緊入lift，都唔肯開門掣，睇住你畀lift門夾鼻哥，呢啲友可以用潮語「手殘」嚟形容。
潮語「手殘」其實係改自另一個潮語「腦殘」，意思係話一啲人舉手之勞都唔去做，隻手好似殘廢一樣，所以叫「手殘」，係極無品嘅一種表現。除咗唔開lift門之外，有時喺啲公共場所門口，「手殘」人士係唔會主動推門，要其他人幫佢推。又或者，佢哋會淨係幫自己推門，緊貼後面就算有人抱住個小朋友，都會照樣唔幫手，任由度門自動關上。當然拖阿婆過馬路呢啲事，唔使旨意「手殘」人士會做。
其實「手殘」同「腦殘」或多或少都有啲關係，如果唔係「腦殘」，又點會有「手殘」嘅行為呢？其實好多香港人成日恥笑大陸人冇品，但以「手殘」人士嘅冇品行為嚟講，港人絕對係五十步笑百步。
記得以前○三年沙士時期，個個人心惶惶，所有公共設施都有機會傳染。有一次同我當時嘅老闆去開會，去到lift口，佢竟然開口叫我去lift！呢種「手殘」唔單止冇品，直情係靠害。不過算啦，喺香港地生存，老闆條命係永遠緊要過你。打工仔條命有幾賤？睇班碼頭工友就知。
