政壇：政商定格：半月賣兩噸金黃英豪笑爆
黃英豪自爆公司半個月賣咗近兩噸黃金，真係賺到笑。
五一黃金周再現搶金潮，咁啱日前喺馬場遇到「新金王」金至尊集團主席Kennedy黃英豪，雖然佢匹愛駒最終冇跑出，但依然笑到四萬咁口，皆因過去兩星期，其集團已售出近兩噸黃金，冇錯，係兩噸。粗略估計，如果以黃金現價每安士一千四百七十美元計算，兩噸黃金淨值已有八億幾港元，仲未計手工利潤喎！
黃英豪自爆公司半個月賣咗近兩噸黃金，真係賺到笑。
對於黃金現貨嚴重短缺，Kennedy建議大家唔使驚之後冇金賣，事關黃金只係一種商品，唔會斷貨，極其量只係供不應求啫！佢仲話金廠嘅工人已日以繼夜、夜以繼日咁加班，過多兩星期，自然就會鋪滿一地喎。佢相信五一搶金潮過後，缺貨情況就會大大改善。金價今次短期內跌破一千三百幾美元，但近日已反彈近一成，佢相信好快會回穩至一千五百美元，短期內都唔會再跌。
