政壇：搞搞政：拉布四子讓步暗藏蠱惑
設計圖片及對白
預算案拉布戰停不了，立法會主席曾鈺成尋日召集各黨派議員舉行閉門會議商討對策，據聞喺會上火藥味濃，首先拉布四子之一嘅梁國雄擺明玩嘢要求用電話錄音，當然被主席阻止啦。建制派席間都有提出抗拉布嘅招數，不外乎係要求主席「剪布」同通宵開會。
設計圖片及對白
雖然泛民主派把口話唔支持拉布，但行動就最誠實，揚言亦唔贊成「剪布」，其中公文袋議員更形容剪布係「核彈」，去年至今都冇用過，於是有人寸泛民呢個曖昧表現，其實同間接拉布冇乜分別喎。不過，要數最辣招，首推拉布四子釋出善意，由人民力量嘅「大舊」陳偉業代表宣布「讓步方案」，第一會減少點算法定人數，第二係就每項合併辯論盡量僅發言一、兩次。如套用泛民用語，其實係「魔鬼在細節」。
有人分析，泛民四子「讓步方案」呢招旨在減少主席以論點重複為由阻止發言，營造會議好似順利進行，到時主席一剪布就會成為醜人，把所有責任都推卸到主席身上，拉布四子則可全身而退。未幾，大舊就喺社交網站自爆，所謂讓步其實係令主席無理由剪布。換句話即係假讓步，可以拖延至較後時間先被剪布，睇嚟呢場拉布同剪布嘅攻防戰將繼續好戲連場。
