政壇：梁振英戴膠錶與傳媒茶敍
CY梁振英尋日喺禮賓府同傳媒茶敍，除推介自種嘅薄荷葉外，仲展示手上戴住嗰隻膠錶，話係一個學會嘅錶，價值一百蚊，之前壞咗都唔捨得丟，所以用咗十蚊去維修個錶扣。之後大家就話想去觀賞佢個小型農莊，佢透露依家塊地種緊瓜，但基於天雨關係都係留喺室內好啲。咁之前「貪曾」前特首曾蔭權爵士養落嘅錦鯉呢？佢話唔識養錦鯉，但禮賓府都有人負責打理喎。
茶敍仲傾到一啲爭議性議題，例如被問到政府依家係咪好似社會啲言論所講，要請示全國人大常委會法律委員會主任委員喬曉陽之後，先可以啟動政改諮詢。CY一聽到就立即以「Rubbish」回應，喻意有關言論係垃圾，絕無此事，因為依家市民最關心嘅係房屋、貧窮、醫療等問題，政府又需時處理，所以政府會喺適當時候先啟動政改諮詢咁話。
之後又有人問佢對民望嘅睇法、對部分人士按佢當選嘅票數「六八九」稱呼佢嘅感覺，佢就笑笑口話六八九已係最高票嗰位，又話會繼續盡最大努力去做。至於對愛護香港力量等支持者嘅睇法，佢話唔評論個別組織，但任何守法、合情、合理嘅活動，無論想表達乜嘢意見，都係好嘅。預算案拉布戰又點睇呢？佢就話拉布唔係第一次，認為有關議員拉布根本唔需要理由，但佢好高興見到今次泛民公開、高調咁同拉布切割，覺得社會不斷進步喎！
