政壇：鐵路爭拗 泛民賊喊捉賊

鬧工聯會拖延嘥公帑

白鴿黨南區區議員區諾軒喺會議廳打響第一槍，話建制派提出下一步先興建薄扶林段鐵路，係出賣南區居民權益，之後仲引經據典話建仔「一噎之故，絕穀不食；一蹶之故，卻足不行」，直頭係讒臣喎。另一80後乳鴿羅健熙就接力翻舊帳，矛頭直指工聯會，批評該會副會長梁富華○四年喺立會動議押後興建西港島線同南港島線，擺明死拖，仲話「阿王」王國興最鍾意講浪費幾多公帑，其實工聯會拖延鐵路工程就浪費咗一百億元。

同屬建仔嘅委員會主席「橄欖」陳鑑林面對乳鴿連番攻擊，當堂黑晒面，叫團體表達意見就算，互相攻訐就唔係幾好嘞！點知乳鴿柴文瀚即刻打斷佢發言，問佢班黨友犯咗咩規程，點解唔可以攻擊其他團體，仲反問「我一陣攻擊民主黨得唔得？」橄欖嬲到震，連喝兩次「唔該你收聲！」先阻止到佢發言。之後阿王都好唔忿氣，話羅健熙借題發揮、翻炒舊資料，攻擊手法好低莊、卑劣。

據理解，南港島線薄扶林段工程仲有爭拗，有泛民區議員唔接受高架橋方案，建制派為咗項目快啲推展，先至同意政府分階段興建，首先興建黃竹坑至華富邨一段，所以有建制派議員質疑，其實係泛民賊喊捉賊至真。