旅霸之風不可長 賠錢了事手尾長

不過咁，今次情況有啲唔同。以前發生旅遊糾紛，大家即時會諗起兩種畫面，一係惡導遊兇神惡煞鬧人，一係宰客刀手強迫購物，奇怪嘅係，今次被人鬧、被人劏嘅唔係內地旅客，而係本港旅行社，都算令人大開眼界咯。

件事係咁嘅，日前一個港澳五天團原定由酒店出發去港澳碼頭，點知未出發，先激憤，有人聲稱不滿旅遊巴遲到咗一粒鐘，要求賠償。其中一對遼寧夫婦聲淚俱下指旅行社欺詐，仲獅子開大口要求向每名團友賠償三千元，另加三晚酒店住宿。旅遊巴遲到一粒鐘，旅客索賠三千元，旅行社形容係勒索，經過討價還價，最終據講由內地組團旅行社負責搞掂。

男兒有淚不輕彈，內地客呢一把眼淚，又誇張又煽情，梗係被人大彈特彈啦。有網民狠批內地旅客無恥、無賴，係專向旅行社屈錢嘅職業旅客；而旅遊業界亦批評，近年旅霸事件愈來愈多，強調此風不可長，呼籲同業謹守本分，以免被人有機可乘咁話。

孔老夫子話齋，有朋自遠方來，不亦樂乎。旅遊本來係尋開心，點知近年成日鬧糾紛，搞到大家都唔開心，都唔知係邊個嘅責任。嗱，今次事件究竟誰是誰非，暫且唔講吖，之但係有一個事實係唔可以迴避嘅，就係有少數內地旅客唔係尋開心，而係搵交嗌，態度惡劣，無理取鬧，成日借題發揮，係又投訴，唔係又投訴，擺明博賠償、搵着數啫，呢種食霸王餐嘅歪風係唔可以坐視嘅，如果唔係，本港旅遊業個招牌遲早被吹到東歪西倒嘅咋！

嗱嗱嗱，大家仲記唔記得「阿蓉事件」呀，一位安徽男團友同女導遊打鬥，事後向本港旅行社索償七十萬元，最後據講獲賠十二萬元。旅遊變賺錢，咁嘅奇異掘金之旅，隨時令好多內地同胞趨之若鶩o架，如果政府唔正視，諗辦法杜絕，到時搵交嗌成為內地同胞來港旅遊嘅必備節目，投訴糾紛無日無之，咁仲成世界嘅。

咁講啦，香港旅行社良莠不齊，經常爆出劏客、強迫購物同瞓旅遊巴醜聞，固然要檢討，但縱容旅霸橫行亦係飲鴆止渴嘅咋。只要行得正，企得正，就唔需要睇人面色，業界千祈唔好諗住息事寧人賠錢了事，咁做根本就係助長歪風呀，叮！