政壇：政商定格：陳南祿構思山頂玩韆鞦
陳南祿有意發展山頂廣場，興建最長嘅韆鞦及空中鋼索吸引遊客。（資料圖片）
山頂可能大變身。恒隆集團董事總經理陳南祿（Philip）尋日同傳媒聚會，透露有意將山頂廣場革新成別具特色嘅旅遊玩樂點，並希望政府能夠配合，佢話山頂廣場居高臨下嘅優點加以善用：「點解我哋唔可以喺山頂上起個最長嘅韆鞦，又或者喺兩幢大廈之間拉條空中鋼索？」
陳南祿有意發展山頂廣場，興建最長嘅韆鞦及空中鋼索吸引遊客。（資料圖片）
除咗山頂，Philip亦建議美化集團旗下嘅銅鑼灣百德新街，首要係將地磚翻新及劃一設計，再換過晒啲垃圾桶，但佢強調，以上建議並非一時三刻可以實行，仲要同政府及其他發展商從長計議。Philip向來主意多多，佢喺千禧年擔任海洋公園董事局主席時，就成功令該園轉虧為盈，最為人津津樂道嘅就係首創萬聖節「十月全城哈囉喂」主題活動喇。
