設計圖片及對白

立法會審議財政預算案撥款大打拉布戰，發起拉布嘅社民連同人民力量議員連日用盡各種手法拖延，尋日一開會，立法會更因人數不足而流會添。事後，泛民同建制又互相推卸責任，呢啲伎倆可以話係議會常見，好笑嘅係，尋日無論係冇開會嘅民協馮檢基，又或者係喺點算人數時特登離開議事廳嘅長毛梁國雄，都唔理自己身有屎，大大聲話建制派議員人數多，流會責任在佢哋。

設計圖片及對白

泛民呢種惡人先告狀式嘅招數，係咪可以推甩流會嘅責任已經令人存疑，更令旁觀嘅市民好火滾，新民黨嘅田北辰可以大大方方為自己冇喺會議廳道歉，阿基解畫自己另外有會要開時，係咪都可以誠心啲承擔自己冇到立法會嘅責任呢？長毛狙擊建制派議員經常周圍點火，今次算唔算倒打一耙呢﹖

講到長毛，聽聞早幾日立法會宴會廳都爆咗單衝突，事緣長毛不滿主席曾鈺成喺辯論中裁決佢發言重複，竟然喺午飯時間衝入宴會廳搵食緊飯嘅曾鈺成理論，點知坐喺主席隔籬嘅張宇人突然忍唔住，企起身反擊長毛，嗌佢唔好阻住人食飯，兩人嘈起上嚟，張期間大聲兼霸氣咁爆咗句：「我廚房佬有咩未見過！」在場者形容惡慣嘅長毛當時都打咗個突，唔知講乜好。

第一手消息請下載on.cc東方互動iPhone/iPad/Android/Windows Phone Apps