教育掠水行舟 香港遲早翻艇

嗱嗱嗱，爆煲嘅唔係學識，而係副學士呀。嶺南大學社區學院及持續進修學院舊年爆出超收醜聞，喺因「財」施教嘅辦學宗旨下，係又收，唔係又收，副學士連同其他文憑課程，總共收生五千三百人，比前年超收近兩倍，其中副學士先修課程更加超收逾四倍添，簡直匪夷所思。教書育人變成誤人子弟，校方受盡千夫所指，今年終於知衰補鑊，叮！

係咁嘅，嶺大日前向校董會提交改善兩間學院營運嘅建議，包括擬將下學年副學士課程收生人數大幅減半，由上年二千二百人削至一千一百五十人，但全校總學生人數不變，維持二千八百人。建議同時提出，將超收所得盈餘繳還政府建校費，僅少數用以提升教學質素。

唉，因財施教，有錢無類，呢盤教育生意何止發水成分高，掠水成分仲高呀！錯就要認，打就企定，將超收盈餘繳還亦無補於事，誤人子弟呢條數點計先。

咁講啦，治學問要尋求根本，解決教育問題都一樣嘅咋。講到底，嶺大超收只係病徵，前朝曾蔭權政府好大喜功好高騖遠，推行所謂教育產業至係病源，港府將教育當係一門生意，將學生當係搖錢樹，自資院校有乜法子唔瘋狂收生？莘莘學子有乜法子唔谷住肚氣？所以話，嶺大減收副學士充其量只係補咗一隻小鑊，更急須補救嘅其實係教育慘業呢隻大鑊，如果任由因財施教嘅歪風繼續吹落去，專上教育濫竽充數，學生質素每況愈下，香港想唔死都幾難！

嗱，唔係嚇大家o架，事實擺在眼前。考評局研究發現，八大院校入學門檻文憑試英文科第三級成績，原來只相等於國際英語水平測試嘅「基礎水平」，連「合格水平」都未達到。即係話，香港大學生嘅英文程度每況愈下，隨時低於國際水平，唔擔心就假！

北大人用逆水行舟做比喻，警告香港競爭力優勢弱化。其實，香港嘅教育唔止逆水行舟，更加係掠水行舟，所以搞到不斷落後，北大人與其一味示警，不如諗辦法鬧醒埋班港產官僚啦。大家都知啦，貪曾同前廉政專員湯顯明貪腐成性，香港賴以成功嘅廉潔與法治已經被敗壞到所剩無幾，如果連教育都禮崩樂壞，香港遲早翻艇嘅咋，叮！