政壇：搞搞政：立會選區重劃 白鴿聽散
設計圖片
政府有意重劃立法會選區，唔同劃法對政黨固有勢力有唔同嘅影響，若採取將新東嘅將軍澳劃入九東、將新西嘅葵青劃入九西嘅話，白鴿黨落力栽培嘅新東、新西勢力嘅第二梯隊就會打散晒。
設計圖片
今屆立會選舉後，黨內幾個大佬都暫時表明下屆唔會再玩，包括黨主席劉慧卿同失落新西議席嘅李永達。面對大佬終於肯出讓議席，唔少新生代即時蠢蠢欲動力求表現，希望得到大佬輩垂青揀佢出選。
上次出選新東嘅副主席蔡耀昌，近來盛傳同下屆有份落場嘅卿姐愛將柯耀林已不斷有明爭暗鬥，希望盡早將「對手」淘汰；而喺舊年選舉後一鋪清袋嘅新西，除陳樹英有機會捲土重來外，據知黨內已屬意由石蔭區議員尹兆堅出戰。不過，新西仲有幾個80後區議員正磨拳擦掌準備上戰場，如果白鴿黨唔肯回應訴求，可能又會引起另一場分化。
西貢同將軍澳係卿姐重要票源之一，如果被強行劃走，無論係對蔡耀昌定係柯耀林，都必然不利。而葵青亦都係佢哋另一重要票倉，如果呢啲票突然劃咗去九西，咁白鴿黨喺九西不足以贏，但喺新西已雞毛鴨血潰不成軍，情況喺新東亦然。
白鴿黨已老化、內訌周身病，外憂內患乜都齊，如果選區真喺咁劃法，四年後嘅白鴿黨，真係慘不忍睹。唔通真係氣數已盡？
