政壇：仔女爭送吻 他信甜入心
他信（左二）笑容滿面，與仔女一同現身富豪飯堂。
泰國前總理他信（Thaksin Shinawatra）熱愛香港，不時都見佢嚟香港食好嘢同買靚嘢。尋日傍晚六點十分，見到他信同三個仔女及一名保鏢同坐私人座駕抵達灣仔富豪飯堂，先落車嘅佢走在最前面，三仔女緊隨其後。精神抖擻嘅他信一貫笑意盈盈，見到記者即停低腳步，等埋仔女一齊企定定影相，之後拖住其中一名愛女進入。見佢兩位囡囡亭亭玉立，加上薄施脂粉，明艷照人，囝囝亦深得爸爸真傳，帥氣十足。
他信（左二）笑容滿面，與仔女一同現身富豪飯堂。
飯後臨別依依，兩愛女（左二及右二）肉緊撲向爸爸吻別。
直到七點五十分，他信一家用餐完畢，先後步出飯堂離開。臨走前兩個乖女似乎對爸爸依依不捨，一同撲向其懷抱，左右夾攻他信面頰深情一吻，他信即甜到入心，不知幾陶醉。囝囝就比較內斂，冇同爸爸吻別，只係同佢輕輕擁抱。等車期間，他信非常友善，同記者揮手道別。問佢享唔享受餐飯？佢甜絲絲咁答：「Yes!」冇幾耐先送三仔女上車，自己則同保鏢隨後乘坐名貴私家車離開。
