政壇：田二少寸周一鑊齋唱歌
田北辰（右）尋日同周一嶽碰面時忍唔住寸周一嶽，話佢經常唱歌。
有「每周一鑊」之稱嘅周一嶽上任平等機會委員會主席後未有建樹，就因收禮風波畀人話佢「污名化」平機會，但佢依舊自得其樂，有歌繼續唱。新民黨立法會議員「田二少」田北辰尋日喺一個社企活動同周一鑊碰頭時都忍唔住寸佢，話佢經常都唱歌咁噃。而周一鑊就答咗句︰「唱歌解決唔到問題嘅。」查實平機會可能只係求佢咪佗衰家，都唔旨意佢會解決到問題。
田北辰（右）尋日同周一嶽碰面時忍唔住寸周一嶽，話佢經常唱歌。
田二少尋日出席社企鑽的青少年社企意念創作比賽活動，同周一鑊齊齊做評判。田二少話平時搭的士啲司機都開到架車左搖右擺，佢都試過因為咁撞親膊頭，萬一自己日後要坐輪椅，搭的士時最關心嘅都係安全問題，所以佢一個月前就扮跛坐輪椅搭鑽的。佢話搭鑽的時司機淨係幫佢上落車、扣安全帶都用咗半個鐘，真係細心又穩陣。
雖然佢大讚鑽的，但就嫌九十蚊一程收費太貴，話最好減到二、三十蚊一程，等啲殘疾人士可以出多啲街。
