政壇：房會隱惡揚善護貪曾
設計圖片及對白
今年係香港公營房屋發展六十周年紀念，香港房屋委員會特別就此製作咗一條宣傳片，但正如大部分宣傳政府政策同歷史嘅廣告片一樣，宣傳片內容都係隱惡揚善，推冧樓價嘅「八萬五」政策同「貪曾」前特首曾蔭權爵士嘅「零居屋」暴政隻字不提，教壞細路兼歪曲歷史。
設計圖片及對白
該段名為「香港公營房屋發展六十年」嘅宣傳片，片長逾十五分鐘，開頭講有關香港公營房屋起源嘅內容都尚算忠於史實，首先提到一九五三年嘅石硤尾木屋區大火，引發前港英政府喺五四年興建香港首批徙置廉租屋，並於六一年首次訂立長遠房屋計劃、七二年推出十年建屋大計、七三年正式成立房委會等。
無提鹹水樓同短樁
講到過去六十年嘅公屋興建同設計，宣傳片詳細介紹咗五十年代嘅六、七層廉租屋、六十年代嘅一字長形公屋、七十代嘅雙塔式公屋，以及八、九十年代嘅Y型同和諧式公屋等，但係就隻字不提當年驚動全港、同樣由貪腐問題引發嘅鹹水樓同短樁醜聞。
至於同為香港房屋特色之一嘅居者有其屋計劃，宣傳片只簡單提到居屋計劃係由七八年開始，○三年結束，之後到一一年又突然有番，完全無提及港府當年提出「八萬五」推冧樓價，導致其後要嗌停居屋救市，以及貪曾政府點樣漠視民意，遲遲唔肯復建居屋嘅歷史，配合晒老董當年嘅「唔講就唔存在」思維。
宣傳片後段大談過去多個新界新市鎮嘅成功發展計劃，疑似有意軟銷嚟緊嘅新界東北發展，最後又強調房委會會致力落實未來五年嘅建屋目標，做好環保建築及無障礙設施等，幫現屆政府唱好宣傳。唔知會唔會有網民幫呢條宣傳片改頭換面，還香港公營房屋發展史一個公道呢？
