廉署清理門戶 毋須勞煩法官
一件污，兩件穢，一件舐盡公私大小便宜嘅前特首曾蔭權爵士，加一件茅台曲奇餅換政協嘅前廉政專員湯顯明，搞到香港廉政形象連環插水。人人喊打貪官之際，又有政客「出謀獻策」，話市民對貪湯忍無可忍，特首梁振英淨係叫廉政公署調查事件係唔足夠嘅，必須委任前終審法院首席法官李國能從速處理，徹查事件喎。
貪湯腐敗激起公憤，港府當然要從速處理，追究到底，但對於某啲政客嘅建議，太一叮實在不敢苟同。正所謂，喺邊度跌低，就喺邊度爬番起身，家陣廉署家門不幸聲譽受損，由廉署自行清理門戶就係最佳安排。再講吖，一朝天子一朝臣，廉署已經換咗一哥以及唯一嘅上司，查番前專員嘅貪案亦無咩唔妥呀。
嗱，周處除三害嘅故事大家聽得多。計太一叮話齋，廉政公署要重建香港廉潔形象，挽救跌跌不休嘅國際廉潔排名，亦要學周處除三害：一除貪曾，二除貪湯，打得呢兩隻大老虎咯喎，自然可以除埋自己招牌上嘅污漬，重振聲威啦！
講到呢度，大家可能會問，徹查貪官辦法多多，由廉署自己清理門戶又得，由特首委任有廣泛代表性嘅調查委員會亦得，點解政客係要眾裏尋他千百度，情有獨鍾點名李國能呢？大家都知，香港一向司法獨大，如果連廉署家醜都交畀前法官調查，廉政司法化，司法廉政化，搞搞下容乜易連廉政公署都被法官大人私有化o架？再咁落去，港人治港遲早變成法官治港都有之，叮！
太一叮不禁諗起，年前東方報業集團踢爆曾蔭權爵士「貪遍省港澳，歎盡海陸空」，核突到連增城菜心同葵花雞都毫不猶豫據為己有。貪曾亦係成立檢討委員會補鑊，亦係由李國能擔任主席，結果做完一輪大龍鳳，淨係提出啲不着邊際嘅改善建議，將貪曾放生。假如再由佢負責查貪湯咯喎，十居八九又係重施捉放曹嘅故技。政客用心良苦，究竟係為民請命反貪官，定係曲線護貪幫湯顯明開脫？
講到底，香港名義上已經回歸，實際上只係換咗一面國旗，港英餘孽分布行政、立法、司法各個機構，表面上吵吵鬧鬧，暗地裏沆瀣一氣，裏應外合，反中亂港，惟恐天下不亂。貪曾係咁，貪湯係咁，嗰啲假民主政客亦係同一路貨色。
唉，廟小妖風大，水淺王八多。香港地方唔大，但到處都有妖魔鬼怪魑魅魍魎，好心廉署快快祭出尚方寶劍斬妖除魔，捍衞核心價值，做番齣好戲畀大家睇啦。
