SUN世代：食腦潮人Duck咗
「Make things new﹗」創作潮人林樹鑫十多年來都堅持，事事要創新，這亦是他個人寫照年少不愛讀書，走過不少迂迴路，直至遇上藝術創作，讓他發揮食腦和創新天分，頓由昔日的迷失青年，成為國際藝術家及漫畫大師的領航員，將他們創作的著名藝術品及卡通人物帶到香港，接連為港人創下神話。
林樹鑫
林樹鑫（前排右）曾為歌手何韻詩（前排中）設計唱片封套，圖為慶功飯局。（受訪者提供）
林樹鑫（左二）善於邀請國際知名藝術家訪港，來自內地的岳敏君（左）是其中一人。
站在「黃色巨鴨」前，林樹鑫（紅圈示）及一眾工作人員，猶如小矮人。
青衣碼頭的黃色巨鴨，明日將泳維港。全城焦點都放在「鴨爸爸」荷蘭藝術家霍夫曼身上，但原來港人林樹鑫才是牽線月老，「一直有留意呢隻鴨，以為係Photoshop效果。後嚟見到留言『如果隻鴨嚟香港就好喇』，我突然醒咗，就試吓聯絡設計師。」
70後的林樹鑫，人稱SK Lam，是創作總監，專門「賣橋」。去年他有份策劃的多啦A夢展，引起哄動，多啦A夢在他口中仍叫「叮噹」：「叮噹係好多香港人嘅集體回憶，咪提議做一百隻一比一叮噹出嚟，日本都未試過做，係全球首次。」在他穿針引線下，不少國際藝術家包括內地的岳敏君都樂意來港分享作品，「做呢行唔可以重重複複，一定要有新嘢。」
剷青頭、穿衞衣，襯牛仔褲，一身典型潮人打扮的他，自言「古靈精怪」，想法與人生路亦然。十四歲舉家移民澳洲，讀書成績差，大學揀不到科，轉完再轉，「走咗去讀測量，但根本無興趣，唔知自己做緊乜，咪轉讀建築設計。後嚟鍾意影相，先至認認真真報讀視覺傳意。」
渾噩了兩年，終於找到方向。從此，他日日「咪書」，勤力到讀爆學分。畢業後在製作公司打工，數月後把心一橫，與友人合資開設多媒體工作室，「自己有好多諗法，幫人打工嘅話，永遠都實踐唔到。」初嘗創業，捱點苦頭，總免不了，「初頭真係無咩生意。」但坐言起行的勇氣，為他帶來回港發展的機遇。「有日本雜誌想搵我去香港幫手，咁啱係我哋舊客，就應承咗。」
九七回歸，他回港了。他的創意細胞，卻未停下來，「雜誌原本只得中、英文版，市場始終有限，於是就做埋地區版，好似韓國版咁。」市場大了，讀者也多了，不到兩年，雜誌由每期賣數百本變為幾萬本，轉虧為盈。為擴展業務，他決定出版世界發行的設計書，於是與另一同事遠赴英國，到出版商拍門，豈料頻食閉門羹，他當然未有放棄，「之後喺間餐廳撞番拒絕過我哋嘅發行商老闆，我拎住手稿衝上去，佢望咗唔夠三分鐘就開咗個價，話肯幫我哋出版。」
最後設計書大賣，每本四百元港幣的書，賣出二萬多本，還要加印。隨後一年，他再出版另外十二本，算是港人創舉。○三年他開設現時的個人創意工作室，享受創作帶來的驚喜，「創作最好玩係大眾嘅反應，好似今次隻鴨咁，估唔到引起咁大回響，仲可以為社會帶嚟正能量，真係好開心。」
林樹鑫小檔案
現職：AllRightsReserved創作總監
學歷：澳洲悉尼KvB Institute of Technology視覺傳意學士
