政壇：鄧家彪擬部署九西直選
鄧家彪（Bill）
工聯會對下一屆立法會選舉嘅部署一浪接一浪，最新嘅動向係鄧家彪（Bill）疑似做先頭部隊，搵咗四通八達嘅旺角開辦事處，似乎係想喺九龍西插旗，呢一屆立法會選舉中，工聯會喺各大選區中獨缺九龍西，唔通阿Bill係九龍西嘅開荒牛﹖
鄧家彪（Bill）
工聯會舊年一心諗住以「風車效應」參加選舉，但最終五區缺一，依家距離未來兩場大型選舉仲有幾年，但前車可鑑，工聯會已密密開始做嘢，九龍西自然係重點。有消息話，阿Bill首先喺九龍西掛橫額已有增人氣之效，其次喺去年底低調地喺旺角樓上舖開咗個四百呎辦事處，位置四通八達，但月租就要一萬五千多元。有地區人士就估呢啲行動同三年後嘅選舉有關。
對於呢個地區嘅傳聞，阿Bill未有正面回應，強調自己喺旺角設立辦事處，一來係接收番上屆勞工界議員潘佩璆嘅職員，二來旺角呢個地方四通八達，方便同各大工會代表開會。不過，之後佢又疑似洩露玄機，話黃國健同麥美娟分別服務緊九龍東同新界西，而九龍西就暫時由佢做住先喎。
