政壇：議員拗利益申報得個吉
議員申報個人利益監察委員會尋日開會，討論《議事規則》第83A條有關規定披露金錢利益事宜，香港總商會代表林健鋒同航運交通界易志明異口同聲話，唔明點解書面申報完利益，開會發言前又要再申報多一次，佢哋認為申報一次已經夠；法律界郭榮鏗就話，唔同意佢哋講法，認為做議員有責任去判斷幾時要申報。
呢個委員會只有幾個委員，但個個講起呢個問題都意見多多，爭拗兩個鐘頭，最後又係得個吉，話要發問卷諮詢全體議員喎。既然要全體議員發表意見，咁呢兩個鐘係咪又係廢話呢？
另外，委員會又公布早前完成有關委任獨立人士為專員處理投訴嘅問卷調查，其實呢個議題由上屆立法會已開始傾，但最後又係決定發問卷諮詢全體議員。秘書處喺今年二月發出問卷，並收回六十九位議員回覆，當中近五成人反對委任獨立人士為專員，同意嘅只有三成三人，其他無意見。由於大比數反對，所以委員會決定以後都唔委任獨立人士為專員。
