政壇：何東外孫女藝術路曲折
Wendy Yeo來港舉行水彩畫展，大嘆香港唔多重視藝術教育。
何東外孫女楊紫霞（Wendy Yeo）喺本港舉行水彩畫展，作品靈感源於多年旅行經歷，當中亦有佢對香港嘅印象。闊別香江二十年嘅Wendy，話香港真係變咗好多，最可惜係依然唔多重視藝術教育。
Wendy Yeo來港舉行水彩畫展，大嘆香港唔多重視藝術教育。
Wendy媽咪何孝芝乃何東平妻張靜蓉所出，系出名門，搞藝術似乎冇難度，點知Wendy當年想讀藝術都遇到家長反對，因為想佢有份「正當職業」。Wendy話，當年佢就揀咗一科好「正當」嘅藝術科目，就係去香港大學讀建築系，一年後Wendy再向家人爭取讀藝術，點知被家人「回價」，要佢考入最好嘅藝術學院先有得傾，好彩最後佢成功考入英國倫敦大學斯萊德美術學院（The Slade School of Fine Art），成功爭取修讀藝術。
佢依家長居英國，不時巡迴各國展出作品，問到佢對何東花園保育失敗又有咩睇法？呢位何東後人笑笑口話，屋企嘅事都係唔講咁多喇！
