政壇：王國興吳亮星齊譴責拉布嘥千萬公帑
設計圖片及對白
立法會因為審議財政預算案撥款而爆拉布戰（議員藉海量修訂或議會程序阻撓進程），議會被癱瘓已經唔係第一次，但議員鬥磨爛蓆嘅無聊狀再次引起好多市民不滿，尋日拉布戰進入第五日，發起拉布戰嘅社民連及人民力量議員就一再以要求點人數拖延時間，淨係計人數都嘥咗一個半鐘。工聯會嘅王國興同金融界嘅吳亮星尋日警告，五日拉布已嘥咗一千二百萬元公帑，要求主席盡快「剪布」，企圖終止拉布燒公帑嘅現狀。
設計圖片及對白
有口痕友話，台灣議會早年屢爆議員打交，因此而成國際新聞，香港近期就時不時爆拉布戰，搞到議會空轉，其實一樣咁可笑。好似尋日就《二○一三年撥款條例草案》的修訂進行第四輪辯論，開會四個鐘，社民連及人民力量議員已經要求點人數多達九次，淨係啟動呢個程序已經浪費咗個半鐘，發起拉布嘅黃毓民要求點人數時好坦白話：「等我都可以唞吓，唔使講……」
「四人拉布 市民找數」
立法會主席曾鈺成開會前已表示，截至前日，立法會「拉布」期間已花咗十二小時二十分鐘點算法定人數，呼籲議員留在議事廳，點知議員席上都係一片零落，拉布四子又趁機藉程序拖長啲。吳亮星尋日忍無可忍，話以立法會一年行政開支六億六千四百萬元計算，一日嘅使費為二百五十五萬元，依家拉布五日，即係已經花費咗一千二百七十五萬元，呢個數字仲係唔包秘書處及議員加班等額外開支。
一再表示會「日以繼夜、夜以繼日」抗拉布嘅王國興就譴責拉布，話拉布嘥嘅公帑已夠資助長者一年免費乘搭電車，要求拉布議員道歉，更要求主席盡快剪布，因為香港已陷入「四人拉布、市民找數」嘅困境。
