勁污染死得人多 環保署粉飾太平
香港空氣污染嚴重路人皆見，唔少外商早已用腳投票，對香港敬而遠之。不過咁，港產官僚不嬲異於常人，環保署尋日發表「粵港珠江三角洲區域空氣監控網絡」報告，竟然話空氣質素持續改善，比起六年前更有大幅好轉添。官僚報告同市民感受南轅北轍，到底大家係咪生活喺同一個星球嘅呢？
環保署聯同廣東省環境保護廳喺十三個珠三角城市及三個香港地區監測空氣質素，去年錄得嘅二氧化硫、二氧化氮同可吸入顆粒物嘅年均值，較前年減少百分之五至百分之二十五；如果同○六年相比，更錄得百分之十七至百分之六十二嘅減幅添。環保署沾沾自喜咁話，區內空氣質素持續改善，證明粵港兩地推行嘅減排措施取得成效云云。
表面睇數據非常亮麗，但魔鬼往往藏於細節。撇開內地嗰筆唔講，香港三個監測地區荃灣、東涌及塔門，除咗荃灣屬於市區，其餘都係離島，塔門更加人迹罕至，喺呢啲地方收集數據，準確性有幾高，代表性有幾大，大家心知肚明。如果環保署唔係為咗粉飾太平做靚盤數，點解唔去銅鑼灣、中環、旺角呢啲空氣污染長期處於高水平嘅地區收集數據呢？
仲有呀，珠三角臭氧濃度不減反增，比○六年上升百分之十三，如果單計香港，去年臭氧濃度比前年更加勁升近四成。高濃度臭氧會增加患呼吸道疾病嘅機會，而臭氧濃度增加亦與工業及汽車排污息息相關。既然係咁，環保署話減排措施取得成效係咪自相矛盾呢？
正如環保團體「地球之友」話齋，近年內地工廠北移，珠三角空氣質素有改善尚算講得通，但不代表香港同樣有改善，認為呢份報告純屬「數字遊戲」，可靠性成疑。老實講，香港空氣好唔好，唔係一份官僚報告說了算，港大醫學院「達理指數」指出，去年本港有三千多人死於空氣污染，造成嘅直接經濟損失高達四百億元。另有環保團體分析發現，香港空氣質素喺三十二個中國城市中排尾二，只係比包尾嘅新疆烏魯木齊好少少咋。
港府治污無方，只知度橋掩飾，市民眼睛係雪亮嘅，點會唔睇得一清二楚吖。咪話太一叮唔提醒，前朝貪曾已經被封為「氣候逃犯」，如果新政府唔想被人話係「氣候逃犯二號」，唔該醒醒定定，切切實實搞好空氣質素，唔好一味文過飾非害死人，叮！
