政壇：政商定格：歐達禮升呢坐IOSCO高位
歐達禮將「升呢」做國際證監會組織（IOSCO） 屬下亞太區委員會（APRC）主席。（資料圖片）
證監會近年一改以往「無牙老虎」形象大發虎威，金融界無不聞風喪膽。最近佢哋又多一單「升呢」嘢！證監會行政總裁歐達禮五月將正式「榮升」國際證監會組織（IOSCO） 屬下亞太區委員會（APRC）主席，係香港首次有人喺IOSCO坐咁高位，為港爭光。
歐達禮將「升呢」做國際證監會組織（IOSCO） 屬下亞太區委員會（APRC）主席。（資料圖片）
其實IOSCO喺監管機構中「輩分」好高 ，佢哋嘅會員監管全球達一百一十五個司法區嘅證券市場，而整個組織按地區分成四個大型委員會，包括歐洲、美洲、中東、非洲同亞太區。
歐達禮今次就係代表香港出任其中一個地區委員會主席，領導亞太區內二十五名成員。對比過去證監會啲「老頂」嘅職位，好似前行政總裁韋奕禮做過IOSCO旗下沽空工作小組主席，甚至前主席沈聯濤做過嘅技術委員會主席，歐嘅職位都比佢哋高。
有人講雖然IOSCO冇實權，訂立嘅監管標準制度，會員未必一定要跟，但香港坐咗呢個位，可以增加喺國際監管事務嘅話語權。
