政壇：搞搞政：借街坊過橋泛民撐拉布
設計圖片及對白
有份就預算案拉布嘅人民力量三子尋日要去法庭應訊，得番社民連「長毛」梁國雄喺立法會獨撐大局，期間佢不斷被建仔嘅蔣麗芸挑機，話佢嘅發言同議程無關同重複，主席亦多次作出警告。長毛死撐咗大約半個鐘，已經被主席下令禁止發言。
設計圖片及對白
泛民主派為免背上癱瘓政府同民生之罪名，誓神劈願講明唔會支持拉布，咁長毛冇得發言，原本係「剪布」、結束該輪辯論嘅大好機會，但新民主同盟范國威就喺呢個時候提出規程問題，撐長毛冇重複發言，但結果失敗。工黨張超雄亦接力幫口發言，但捱咗半個鐘，都係要結束該輪辯論。跟住泛民就好似解禁咁，喺辯論削減特首薪金時你一言、我一語。之後白鴿黨劉慧卿同公文袋梁家傑都唔執輸，加入噏埋一份。劉慧卿更加話有街坊想佢哋「拉布」，似乎想借街坊做反口幫手拉布嘅擋箭牌。
跟住公共專業聯盟成員、會計界梁繼昌就不滿反「拉布」嘅工聯會王國興喺會議廳內貼書法大字報覆蓋面太大，有礙觀瞻，於是向主席投訴。不過，主席就話王國興鄰近嘅議員都有份幫佢貼大字報，應該冇造成阻礙；至於係咪有礙觀瞻，都係等議員自己掌握分寸喎。雖然最終投訴不成，但都間接幫手拖延咗部分時間囉！
