政壇：乳鴿抽水變幫政府宣傳
政府日前以「家是香港」名義搞咗幾場高官全港清潔騷，結果鬧出連場笑話，包括被指掃「假垃圾」造假，有高官自揭平時少做家務，唔識用力掃爛咗兩把掃帚等。有白鴿黨年輕黨員亦想借呢場亂騷博出位，但反而被網民鬧爆，質疑佢變相幫政府宣傳。
曾參選上屆區議會但落敗嘅乳鴿吳兆康，近日喺社交網站上載咗一張電腦合成嘅海報，顯示佢拖住個得一、兩歲大嘅囝囝，扮晒勵志咁指住「家是香港」四隻大字，原意係想話香港要有民主自由，港人先會真正感受到「家是香港」。
不過，由於海報嘅表達手法太似官方樣板宣傳品，有網民就留言質疑佢有意無意幫咗政府宣傳，完全起唔到諷刺或批評政府嘅效果。有網民更加攞番晒白鴿黨當年支持政改方案啲臭史嚟講，嘲諷海報中吳兆康隻手所指嘅，其實係指向西環。連改圖抽水都抽出禍，只能自嘆句水平低囉！
