政壇：廠商會會董齊歎「一夜情」
蔡少森（左一）帶來自家養殖嘅「一夜情」翡翠魚宴會友，鍾國斌（中）大讚好鮮味。（受訪者提供）
中華廠商聯合會早前舉行會董會晚宴，一眾成員拉大隊去一家潮州菜館品嘗美食，作為會董之一嘅立法會紡織及製衣界議員Felix鍾國斌都有參加。話說當晚除咗一般潮州美食外，會董蔡少森仲帶咗條私伙鹹魚同大家分享，呢條鹹魚名為「一夜情」，Felix食過都話「一夜情」正呀！
蔡少森（左一）帶來自家養殖嘅「一夜情」翡翠魚宴會友，鍾國斌（中）大讚好鮮味。（受訪者提供）
呢條鹹魚之所以叫做「一夜情」，係因為廚師會先將原條魚用鹽醃過夜，因為只醃一晚，所以肉質依然鮮嫩滑溜，唔會得個鹹字。蔡少森話近期喺內地自設環保室內養殖魚場，培育來自澳洲嘅翡翠魚，餵飼嘅魚糧、水溫控制都符合環保條件，等大家食得安心啲。
當晚仲有另一位會董葉志光喺台灣帶咗啲珍貴嘅牛樟芝返港，炖成養生湯畀大家品嘗，大家第一時間唔係飲靚湯，而係拎起筷子爭住試食煲過湯嘅牛樟芝。據講牛樟芝可以增強免疫力，飲咗抗流感病毒就最啱喇。
