最近跳水公主郭晶晶傳有身孕，老爺霍震霆前日被問及此時連番叫大家直接問啟剛，但一直笑容滿面，尋日霍震霆嘅細佬霍震寰出席工聯會慶祝成立六十五周年酒會時，被追問同一問題時首先反問「爸爸（即啟剛）講咗未?」問到係咪要買定禮物，佢終於開金口話依家仲早，仲未見到個肚喎！

講番工聯會尋日個酒會，由於立法會拉布戰持續，工聯會六名議員事先張揚話未能出席，其他建制派議員都行唔開，工聯會榮譽會長鄭耀棠之後爆料，話有會員同佢投訴點解唔見晒工聯會六名議員，佢好無奈話無法子，因為要好似廣告話齋「坐定定喺度，企定定喺度」。

第一手消息請下載on.cc東方互動iPhone/iPad/Android/Windows Phone Apps