政壇：高官清潔騷暗藏心計
設計圖片及對白
政務司司長林鄭月娥牽頭推出「家是香港」活動發放正能量，頭炮係「全城清潔運動」，問責官員連續三日輪流落區掃街同派消毒包，但唔覺發放咗乜嘢能量之餘，仲惹嚟外界批評係整色整水、做騷。
設計圖片及對白
其實，連日來班落區嘅問責官員蝦碌連場，財爺鬍鬚曾去專門打小人嘅鵝頸橋底做騷都冇人理，反應咁差，似乎安排都好粗疏下，但估唔到原來要分配三司十二局落區做爛騷，事前竟然有算過度過，事關有部分區域嘅地區議題，直接由某些高官負責推銷，為免惹來爭議就盡量要避開，據聞其中一個三煞位就係屯門區。
有知情人士話，政府早前想喺屯門曾咀起焚化爐遇到種種阻礙，本身屯門鄰近新界東北發展計劃，加上區區都有骨灰龕位計劃，所以為免令關注團體出動狙擊主事官員，所以據聞當局評估後，唔建議環境局局長黃錦星、發展局局長陳茂波同食物及衞生局局長高永文揀呢區做社區衞生，改為搵咗相對政治中立嘅公務員事務局局長鄧國威到該區。
避唔到長毛狙擊
此外，個別高官落區地點亦要較為謹慎，就以黃錦星為例，有堆填區嘅地方好似將軍澳都要避免到，免得畀關注關閉堆填區人士搶晒鎂光燈，最後黃錦星到咗牛頭角做清潔活動，事實亦證明活動係順利進行。
不過，亦有部分突發事件令政府官員難以事前評估，好似勞工及福利局局長張建宗到九龍城落區，「長毛」梁國雄等人就如影隨形就碼頭工潮事件狙擊，呢個就點都避唔到喇！
