禽流感殺到埋身 搞衞生不容再懶
港府嘅三日鮮全城清潔騷嚟到尾聲嘞，日前官老爺為求假戲真做，居然自編自導自演掃假垃圾，真係唔知應該讚佢逼真吖，定係鬧佢低能。之不過咁，洗太平地只係一種姿態，垃圾真又好假又好，大家毋須深究，反而要（目及）實嘅係港府整個防疫工程做成點。譬如話加強口岸措施，係咪又係做騷o架？係咪又係垃圾一堆嚟o架？
太一叮之所以咁緊張口岸防疫，原因好簡單，因為H7N9禽流感已經兵臨城下嘞！港府收到內地通報，廣東東莞一個家禽批發市場發現一個活雞樣本疑似帶有H7禽流感病毒，目前正等候覆檢結果。今次係廣東省首次疑似中招，港府唔敢懶懶閒，話非常關注事件喎，又話有既定政策把關，保證出事養殖場附近十三公里範圍內嘅其他養殖場一律立刻禁止活雞供港咁話。
連廣東都疑似失守，香港仲點獨善其身呢？日前之嘛，湖南省首次確診兩宗禽流感病例，加上已經失守嘅福建省同江西省，隱隱然形成疫情包抄粵港之勢，唔驚就假。更加諗起都心寒嘅係，春天候鳥明明向北遷徙o架嘛，禽流感喺華南地區理應杳然無蹤至正常，家陣疫情路線圖倒轉頭行，詭異程度同官老爺作狀掃街有得揮，容乜易無聲無息入咗香港都唔知o架！
嗱嗱嗱，唔係嚇大家o架，第一個高危期話咁快殺到。內地「五一」假期後日開始，來港掃貨玩樂嘅消費候鳥大舉南下，唔使多o架，只要走甩一個帶菌者，香港就隨時雞毛鴨血。中港專家講得好清楚，禽流感一旦再變種就會人傳人。你話嘞，如果口岸防疫仲係一個把關鬆懈嘅無掩雞籠，香港係咪危危乎吖？
咁講啦，廣東疑似失守，疫情反常南下，病毒隨時變種，其實都係反映緊一樣嘢，就係病疫入侵香港嘅危機愈來愈大。兵臨城下嘞，殺到埋身嘞，唔該港府醒醒定定，認認真真做好口岸把關，切切實實制訂預防措施，真真正正搞好環境衞生，唔好再急驚風遇着慢郎中，唔該。
點解太一叮咁先天下之憂而憂呢？好簡單啫，本報兩星期前一連兩日踢爆全港多區街市、後巷、大廈簷篷同排檔衞生惡劣，滿布垃圾，成為傳播病毒幕後黑手，點知近日重返現場視察，發現大部分黑點惡劣情況零改善，情況唔令人擔心就假！
禽流感殺到埋身，搞衞生不容再懶。港產官僚醒覺啦，如果香港再有瘟疫蔓延，你哋唔使掃假垃圾嘞，做真垃圾被市民掃走啦，叮！
