SUN搞作：打橫嚟講：「家是香港」要啲乜呢？
「家是香港」？哈哈！由一個「家在英倫」的舊電池林鄭月娥扯大旗？哈哈！英國人唔識中文，也應聽過乜嘢叫做「名不正，言不順」吧！
吓！「家是香港」？乜叉嘢中文嚟o架？「家」和「香港」兩個名詞中間，用個「肯定式」的連接詞，就等於好中文？呢啲只係香港公務員水平的爛中文，唔孭鑊，但欠秀氣，無文采，零質素！
「家在香港」、「家繫香港」（「家紘」亦得），甚或「家乘香港」也不錯（嗱！唔係「家誠」呀！），點都好過「家是」咁佶屈聱牙，詞不達意呢！
講到不達詞，睇到那些「造假」都做得衰過人嘅香港庸官洗街，真笑死人，全不到位。林鄭笑口噬噬咁抹扶手，做清潔女工會咁開心o架咩？後面那班隨從居然仲喺度拍掌稱慶，好高興咩？只是大陸化咋！仲有劏房波人未到，居然有人先在路上丟「假垃圾」畀佢在記者面前表演「真垃圾掃假垃圾」，佢都夠PKo架啦！嗰件叫譚志源嘅膠人仲騎呢，連把掃把都掃斷埋，當眾示範乜嘢叫做「甩頭甩骨」。揸掃把應該叫葉劉淑儀吖嘛！
未做政治show前，林鄭還講到呢劑係凝聚港人人心嘅行動，原來，只不過一大棚高官show最低能一面，讓大家笑爆嘴而已！可惜，咁樣，我哋香港人係唔收貨o架！
香港，是我們香港人的家，我們需要的，係民主、自由、人權、法治和高度自治，而非一群低B聽話的奴才扮小丑唧我哋笑呀！否則，「冚家×香港」咋！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
