政壇：搞搞政：仙人掌做紀念品高官受落
設計圖片及對白
前廉政專員湯顯明涉嫌濫用公帑頻頻設宴同送禮畀內地官員，事件遭揭發後連帶問責官員酬酢同接受紀念品安排，都畀外間金睛火眼（目及）實，建制派多名立法會議員近日議員辦事處開張時都有特別安排。
設計圖片及對白
立會議員KK黃國健尋日喺秀茂坪開設議員辦事處，邀得食物及衞生局局長高永文同勞工處處長卓永興等人做主禮嘉賓，KK送咗仙人掌畀各主禮嘉賓，一定係貪仙人掌生命力夠強喇。KK話最近呢兩年佢哋送畀嘉賓嘅紀念品主要係植物，好似今次嘅仙人掌只係最多二十蚊。
另一議員陳克勤尋日聯同大埔區議員黃容根喺太和開聯合辦事處，出席主禮嘅運輸及房屋局局長張炳良既無戴襟花，主人家贈送嘅蘭花亦只係用作合照之用。據聞張炳良事後都冇拎走，睇怕各高官見到貪湯因酬酢安排一身蟻，加上特首又三申五令參加活動時唔接受紀念品，出席活動時都增加咗警覺性啦！
