政壇：鬍鬚曾派防疫包無人吼
鬍鬚曾喺鵝頸橋底企咗一輪，都搵唔到人接佢嘅防疫包。
吸取前兩日政府官員落區宣傳全城清潔日嘅教訓，財爺鬍鬚曾尋日去銅鑼灣洗地時冇再整爛掃把，雖然佢懶醒咁選擇喺平時人來人往嘅鵝頸橋底派防疫包，但佢似乎唔記得咗尋日係星期日，冇乜人會好似佢咁六點鐘就起身，所以佢喺朝早近九點行咗成幾分鐘，都冇市民肯接佢手上嘅防疫包。
鬍鬚曾喺鵝頸橋底企咗一輪，都搵唔到人接佢嘅防疫包。
佢派完防疫包後就喺網誌撰文，話呢個星期嘅天氣仍是煙雨淒迷，令人納悶，相信唔少立法會議員、秘書處和政府的同事也會有同感。佢講緊嘅，當然係預算案嘅拉布啦，佢話四個立會議員拉布，等如「綁架」預算案，又批評拉布行為猶如「七傷拳」傷人傷己，又話其實呢個係三無嘅行為，即係無社會共識、得唔到人支持、對社會亦冇任何得益，呼籲議員適可而止，唔好繼續綁架預算案嘥晒立會時間。佢又向各黨派議員致敬，話佢哋堅持出席呢啲不必要嘅冗長會議，令審議預算案的工作沒有中斷。預算拉布繼續，過咗周末，拉布今日九點開始。
