權貴會所不合時 還地於民莫遲疑

今時今日，廉政公署同無殼蝸牛都面對同一個困境，就係無地自容，當然，此地不同彼地。

前廉署一哥湯顯明爆出連串大花筒醜聞，廉政專員居然變咗不廉專員，反腐一哥淪為腐敗一哥，真係講都無人信。而同湯顯明一樣淪為市民箭靶嘅，就係嗰啲霸佔公家土地嘅豪華私人會所。試諗吓，政府一方面話搵唔到地建屋，大量蟻民被迫捱劏房住籠屋，一方面就浪費大量土地資源，畀富豪權貴做私家俱樂部，你話幾咁荒謬吖！

呢啲荒謬現象有無可能扭轉過來呢？嗱，不廉專員湯顯明嘅下場係點，大家暫時唔敢講，但解決私人會所霸佔靚地問題，就睇到少少轉機。

件事係咁嘅，當局打算重新發展銅鑼灣加路連山道一帶土地，首次計劃收回區內兩幅以私人會所形式批出嘅用地。據估計，呢兩幅地皮面積合共一公頃，如果改作住宅發展，呎價料逾二萬元，土地估值超過三百億元。當局話喎，兩幅土地每年以象徵式一百元地稅租出，承租人現只獲按季續租，換句話講，當局只須三個月前通知即可終止續租，還地於民，乾手淨腳。

嗱，早就應該收回地皮啦！基層市民苦無立錐之地，當局居然將數百億元地王白白送畀富豪做遊樂場，唔覺得對唔住市民咩？土地資源係公家嘅，家陣香港最需要土地建屋安民，收回私人會所用地唔止係理所當然，更加係刻不容緩，港產官僚今次醒醒定定，千祈唔好又議而不決，決而不行呀！

其實，應該收回嘅地皮何止兩幅咁少吖。本報早前踢爆，全港有七十幾幅私人會所用地，當中五十五幅租約早已到期，當局揚言全力覓地建屋，又話寸土必爭，又話地盡其用，本應把握時機，收回地皮，點知事實啱啱相反，當局竟然計劃畀呢啲私人會所續租喎，你話係咪不可思議吖。

話時話，收回私人會所用地乃係民心所向，大勢所趨。撇開缺地問題唔講吖，以公家土地供權貴享樂，根本係殖民地時代遺留落嚟嘅特權產物，早就不合時宜。家陣香港貧富懸殊日趨嚴重，仇富仇官情緒升溫，喺咁多市民貧無立錐之地嘅情況下，當局仲為權貴錦上添花，遲早引爆民怨核彈嘅咋。有辦你睇，碼頭工潮波濤洶湧，立法會拉布戰火花四濺，講到底，咪就係深層次矛盾激化嘅結果囉。

港產官僚唔好猶豫嘞，快快拆除私人會所炸彈，還地於民，你哋都唔想好似貪曾同貪湯咁，成為千夫所指o架，叮！