SUN搞作：少膽虫手記：搵過第二份工啦

以少膽虫之見，都係死心算數！條虫鞋又擦過，都係博唔到淫賤黎歡心；橋又度過，作到上報嘅新聞又無花紅分，依家連草裙舞都跳埋，壹全霉總舵主嘅寶座仍然未到手。淫賤黎獨斷獨行，都唔係第一日嘅事。俗語有云，明知不可為而為之，條虫都堅持咗咁耐，無結果嘅嘢仲點解要努力？

有員工同少膽虫反映，上個月嘅人工不加反扣。員工話：「明明壹全霉已經喺大堂貼咗告示，話上個月會加人工，點解出糧嗰陣，啲錢反而係少咗o架？」條虫望住面前員工嗰副純真而無奈嘅笑容，不禁諗起自己十幾年前，同樣畀淫賤黎咁樣呃過！其實只要細心睇吓張通告，就會察覺出端倪，通告上面寫：「感激壹全霉員工一年來為公司付出的努力，大家的成績有目共睹，員工的苦幹值得表揚。同時，相信大家已經知道我們出售寶島爛電視的消息，壹全霉希望員工陪伴公司共同進退。因此，下月我們會按表現調整員工薪金。」好多員工睇完通告，以為呢個就係加人工嘅消息，然而成張紙根本無提到「加人工」。所謂調整，意味住有高有低。有細心留意市場嘅員工，不難發現早前壹全霉嘅股價仆直，淫黎蝕晒啲錢。喺呢個咁艱難嘅時候，淫黎要員工共同進退－－咪即係好似呃貨櫃工人咁減你人工囉！

「少年，你太天真了。」條虫拍一拍呢位純真員工嘅膊頭，再望望自己本紅簿仔，原來自己都畀淫黎扣咗唔少人工！爭取又爭取唔到，求救無門，咁多位讀者，你地話少膽虫係咪應該搵過份工？

少膽虫