政壇：政商定格：陳世昌買金講個「信」字

中國經濟無疑係崛起咗，但軟實力仲差一大截，中國企業品牌係典型例子。內地好多企業近年堅持「走出去」，好似海爾集團總裁楊綿綿咁，多年嚟努力將海爾發展成全球第一白色家電品牌，堅信喺出口市場要有品牌先有價值。「走出去」係內企嘅集體目標，佢話海爾一走就要走三步，即「走出去」、「走進去」（喺外國市場立足）然後「走上去」（喺外國做到人人喜歡）。點樣做到？佢話「品（牌）」字三個「口」，所以各方口碑一定唔少得。

講到口碑重要性，相信周大福執董陳世昌第一個贊成，佢話記得八十年代，當時香港賣金純度仲係「無王管」，唔少金條純度都有報假，但因為周大福堅持黃金純度，所以嗰時當舖收黃金時有兩個價，分周大福價同普通店價，時至今日佢依然堅持買金同時係買一份信譽。但內地造假情況令人吃驚，陳總都話最怕假冒者做壞品牌，打官司都可能贏官司輸錢，惟有寄望內地搞好產權保護。