政壇：搞搞政：卓永興鬼祟避記者

勞工及福利局局長張建宗幾乎要日日出來為貨櫃碼頭工潮斡旋解畫，但奇就奇在佢下屬勞工處處長卓永興喺工潮中唔多見影。勞工處做緊乜？

咁啱卓永興尋日出席勞工處同職業安全健康局搞嘅高處工作安全論壇，論壇未開始前，記者已經同大會公關表明希望同處長做訪問，問吓處方將會做乜嘢協助解決工潮、高寶工人遣散進度等等。到論壇中場休息，一眾嘉賓同參與論壇人士一齊步出會場，記者都到場外等卓永興，點知等極都唔見人，原來佢已經走咗。咁神奇？睇嚟都係鬼祟行後門喇！

其實，卓永興做「隱形快閃黨」都有前科，對上一次係去年出席防暑運動，記者打算訪問佢防暑措施，點知佢又喺活動完咗就走入室內歎冷氣，佢「快閃」速度真係快到你唔信。唉！如果佢以「快閃」嘅速度同決心去解決工潮就好喇！