政壇：康叔捉鬼 咬實李鵬飛

前港區全國人大代表吳康民不點名批評舊年喺特首選舉鼓吹投白票嘅政黨係港英餘孽第二梯隊，除咗觸發富貴黨榮譽主席對號入座外，就連該黨創黨主席李鵬飛都澄清自己冇英國護照。尋日康叔再度撰文反駁，指李鵬飛曾經被推薦做第一屆行政長官，先至冇被英國封爵同領取英國護照，否則已到英國當上議院議員。

康叔以「氣急敗壞，對號入座」為題，話如果李鵬飛認為英國人喺回歸後冇布線眼、冇幕後操縱政治人物，咁一係佢太天真，一係隱瞞事實。佢仲連環向李鵬飛發炮，重提幾件舊事作例，佢話當年《基本法》廿三條立法時，李鵬飛身為港區全國人大代表，竟帶頭危言聳聽，話廿三條立法後會「血洗中環」，又去參加反廿三條集會。

佢嘅另一疑惑，就係九七回歸前，如果李鵬飛係愛國分子，應該多宣傳《基本法》，對香港高度自治作保證，但點解佢要替二十五萬港人爭取居英權呢？佢仲教大家分辨何為「港英餘孽」，「港英餘孽」係一極小撮嘅人，只要睇吓佢喺「政治緊急關頭」，到底係咪維護大局，定係背後捅人一刀，就知一二，群眾眼睛係雪亮嘅。