貪腐醜聞揭不盡 廉政招牌危危乎

貪腐會上癮，一沾上身就搣唔甩。嗱，前廉政專員湯顯明又爆醜聞嘞，真係長爆長有，愈爆愈臭，叮！

繼被踢爆瘋狂外訪、瘋狂送禮，同埋連串大花筒混帳之後，湯顯明又被揭任內自把自為，揮霍公帑。話說一○年底，湯顯明喺本港五星級酒店兩度設宴招待內地官員，又有茅台又有XO，合共消費近八萬元，人均消費超過一千二百元，比廉署規定四百五十元嘅上限超支一點六倍。廉署職責係肅貪倡廉，廉政專員利用公帑花天酒地，不廉不正，認真諷刺。

更諷刺嘅係，其中一次居然係宴請來港答謝港府○八年汶川地震撥款賑災嘅四川高官，睇嚟佢哋最想多謝嘅唔係港府，而係湯顯明至真。試諗吓，港府賑災根本唔關廉署事，點解要由湯顯明出面豪宴四川高官呢？如果話當中冇蠱惑咯喎，細路仔都唔信喇。呢，廉署日前公布湯顯明五年任內瘋狂送禮嘅清單，絕大部分係送畀內地官員，佢咁識做，又豪宴又送禮，難怪有得做全國政協委員啦。

即係咁，湯顯明想攀附權貴無人會阻佢，不過唔好濫用公帑，搞臭廉署個招牌吖。你話喇，佢究竟係搞廉政定搞關係呀？究竟係肅貪倡廉定鼓勵貪風呀？再咁落去，廉署不如改名叫「應酬署」喇，笨！

你話係咪愈爆愈臭吖，審計署早前踢爆廉署一連串篤數請客混帳，最貴嗰餐係每人盛惠一千零四十五元，都夠晒離譜o架啦，點知今次仲離譜。話時話，呢啲只係冰山一角嘅咋，分分鐘仲有更多醜聞未爆出嚟，所以咯喎，立法會議員要求開會跟進，太一叮舉腳贊成o架，香港廉政得來不易，絕對唔可以畀枉法之徒逍遙法外吖。至於有市民鬧爆湯顯明，指佢嘅政協身份侮辱香港人，應該予以褫奪，太一叮反而覺得冇乜所謂喎，橫掂政協藏污納垢，烏煙瘴氣，都幾啱湯顯明呢種人吖，係咪？

所以話，近朱者赤，近墨者黑，湯顯明被視為煲呔曾爵士嘅愛將，上行下效，有樣學樣，都好正常啫。唔怪得貪曾涉及貪腐單畸士到依家仲係無聲無息喇，佢哋根本就係沆瀣一氣，蛇鼠一窩！

一句講晒，貪腐醜聞揭不盡，廉政招牌危危乎。當局與其搞香港清潔運動，不如搞廉署清潔運動好過啦，一來清理門戶，二來重建廉政形象，叮！