政壇：政商定格：莊偉茵速瘦鄧達智難忘

資深時裝設計師William鄧達智嘅新店早前開張，作為佢老友、曾効力國泰航空十幾年嘅中華電力企業發展總裁Quince莊偉茵亦有撐場，William就爆料話，十幾年前大家初相識時，Quince曾經幾有肉地，事關當時佢啱啱生完細仔，好難瘦。冇耐國泰爆發激烈工潮，兩人再相逢時，Quince竟然激瘦咗三個碼，William至今難忘。

聽William爆出陳年往事，佢就笑笑口話，當年真係好肥，形容自己係「肥婆師奶」。工潮爆發確實令佢開始落磅，但直至一兩年後，佢升任機艙服務總經理，需要管埋空姐，諗住以身作則Keep好身形，先至真正瘦咗落嚟。佢笑稱，同肥師奶時期相比，事實確係激瘦三個碼。

當日Quince睇中一件靚衫，仲急不及待試上身。原來佢今次先至第一次幫襯，因William北上發展十幾年，告別香港零售市場，佢想買都唔得。