禽流感隨時殺到 減病房倒行逆施

四川再次發生死傷枕藉嘅大地震,再次提醒大家人生無常、奪命危機無處不在,做人嘅嘢,除咗要珍惜生命、活在當下,仲要防患未然,將發生災難嘅可能性同殺傷力降到最低。對香港來講,目前最大嘅威脅毫無疑問係H7N9禽流感。

大家有眼見,禽流感疫潮喺內地持續蔓延,確診病例已經突破一百大關,死亡率同沙士有得揮,何況目前仲有唔少隱形患者潛伏社區,南下香江只係時間嘅問題。既然疫魔隨時殺到,港府係咪應該打醒十二分精神,做好預防措施呢?

死得佢吖,作為新界東嘅抗疫重鎮,威爾斯親王醫院唔知黐咗邊條筋,居然失驚無神縮減兩間流感病房,其中一間尋日已經關閉,另一間亦將於月底停止服務,計計埋埋,起碼減少五十張病床。喂,面對疫症威脅,威院管理層關人個關,唔單止冇枕戈待旦做足準備,反而鳴金收兵減少病床,你話係咪反智吖!

威院話喎,因為兩間病房專為應付流感高峰而設,家陣冬季已過,所以唔使再開。叮你個鎯鎯呀,流感成年都有o架啦,正如傳染病專家警告,禽流感病毒最容易喺濕熱環境孳生,對粵港澳地區來講,夏季先至係疫症傳播嘅高危期。公立醫院多一分準備,市民就少一分危險,點可以一過冬季就放鬆警惕o架!逢人都話疫魔神出鬼沒殺人於無形,計太一叮話齋,醫療庸官害人不淺,簡直就係為魔作倀。

話時話,威院嘅病床本來已經供不應求,本報早前揭發威院逼爆亂象,病床平均使用率超過百分之一百,今次記者故地重遊,發現亂象有增無減,幾十個需要入院嘅病人滯留急症室,而院方居然收起現成病床唔用,真係畀佢吹脹!

有人無床用,有床無人用,令人不得不佩服威院嘅九流管理。太一叮思疑,威院藉口多多減少病床,縮減服務,係咪想將啲病人趕去私家醫院呢?醫療體系歧視窮人,睇嚟前食衞局局長周一嶽雖然已經走人,佢嘅劣政依然喺公院陰魂不散。

講到底,疫症隨時殺到,病房關門大吉,倒行逆施嘅後果顯而易見。公立醫院病床人手樣樣奇缺,本身已係七個蓋冚十個煲,家陣醫療官僚唔去增加資源,反而再抽走兩個蓋,變成五個蓋冚十個煲,想唔出事都幾難啦,叮!

第一手消息請下載on.cc東方互動iPhone/iPad/Android/Windows Phone Apps