SUN世代：5秒祖業升呢
五秒鐘改變了他的命運。梁毓偉出生玩具世家，不甘心安享前人種下果實的平坦道路，深明家族生意要改革才會進步，於是心口掛個勇字，到外國一間管理公司由低做起，學到多花五秒鐘可以管理好公司的必殺技，學成返港，帶領祖業升格，首項工作是運用電腦系統將公司規範化。但家族是老字號，制度沿用半世紀，面對新舊衝擊，梁毓偉未驚過。
現時是龍昌投資聯席董事的梁毓偉，十二歲開始到英國讀書，畢業後加入英國著名管理公司由低做起。「因為自己讀管理學同市場學，畢業之後想學以致用，亦想了解吓外國嘅公司點樣運作。」
印象最深刻是一天放工後，主管叫梁毓偉留下，請他喝啤酒，摸住酒杯底，主管講出真心話：「佢話我今日儲存Excel文件時，無特登將文件儲存喺A1嘅一小格，唔夠專業。」後來他發覺，一般儲存Excel文件，偶爾會移位；但只要多花五秒，將文件儲存在A1格，就可以確保文件不會移位，客人看得舒服。這些外國人重視的細節，就是認真和專業。
「呢件事影響我以後嘅工作態度，好多事都盡量系統化、專業化。」接受過管理公司的「專業」訓練四年後，一一年，梁毓偉回巢。他發覺家庭式經營生意欠系統，只紀錄出入貨資料，中途出錯較難追查，遂將外國學來的一套經營方式帶回家，將公司營運規範化及電腦化。首先將公司的營運系統全電腦化，入倉、接單、出貨和收錢都用電腦系統監察，令交易過程清晰有條理。
以新思維改革公司實在不容易，尤其是梁毓偉的家族玩具公司屬行內老字號，舊有制度已沿用幾十年，霎時間每件事都要紀錄，員工少不免抱怨：「『點解要咁煩，好影響工作效率！』我明白佢哋心態，但呢啲專業化管理，往往就係有事時先知道重要，好似買保險咁。」最終，員工亦明白梁毓偉苦心經營是為了公司，都會欣然接受。
除了改革管理模式，梁毓偉亦身體力行，每日花四小時駕車來往東莞廠房監工，風雨不改：「內地嘅工作文化就係要面對面嚟管理，見唔到老闆，員工就會散漫。」做生意一分耕耘，一分收穫，所以過農曆新年時，他也飛到美國巡視當地公司業務，很久沒放過假。
回巢至今已經三年，梁毓偉謙稱仍在揣摩階段，要向公司長輩學習，期望有一日獨當一面，做出成績給家人看：「喺外面打工，每半年公司都會評估能力，安排合適工作，但喺家族公司就無呢回事。」至今父親未曾讚賞過一句，兒子最期望有朝一日能得到父親認同：「我好希望做出成績，令長輩早啲放心。」
梁毓偉小檔案
學歷 ：倫敦大學國王學院（主修市場學）
現職 ：龍昌投資聯席董事
婚姻狀況：未婚
興趣：高爾夫球、籃球
梁毓偉期望有一日能獨當一面，做出成績給家人看。
梁毓偉（中）與家人關係密切，常與姪仔姪女打成一片。
梁毓偉（中）十二歲就被父母安排到英國升學。
梁毓偉愛打高爾夫球，在揮桿之間領略到人生道理。
梁毓偉（左二）曾與中學同學參加英國的毅行者。
熱愛體育運動的梁毓偉（右），曾經偕友人觀賞七人欖球賽。（受訪者提供）